Erik Ten Hag na fuskantar matsin lamba gabanin tafiya da Southampton ranar Asabar bayan da Liverpool ta basa kashi da ci 3-0 kafin a tafi hutu.
Shugaba Omar Berrada da darektan wasanni Dan Ashworth duk sun goyi bayan dan kasar Holland a bainar jama’a.
Sai dai hakan bai dakatar da rade-radin cewa tsohon kocin na Ajax zai iya rasa gurbinsa a Old Trafford watanni kadan bayan da aka tsawaita kwantiraginsa zuwa shekarar 2026.
“Ba ya tasiri a gareni,” in ji Ten Hag. Yace;
“Na san a cikin tsarin inda muke, inda za mu dosa, muna cikin lokacin sauyawa, dole ne mu hada matasa da yawa a cikin kungiyar.”
“Dole ne mu dawo da raunin da aka samu a cikin kungiyar, kafin kowa ya yi tunanin uzuri, dole ne mu ci nasara a kowane wasa, na san hakan. Kungiyar ta san wannan. Za mu mai da hankali kan kowane wasa kuma mu kasance da tunanin cewa dole ne mu yi nasara.”
A halin da ake ciki, Ten Hag ya tabbatar da cewa Luke Shaw da Rasmus Højlund ba za su buga wasan da Southampton a ranar Asabar ba yayin da suke ci gaba da murmurewa daga raunin da suka samu.
Sabon dan wasan Manuel Ugarte na iya buga wasansa na farko bayan da ya dawo taka leda a ranar Alhamis.
